30 ára reynsla af djúpdælum

Árið 2025 markaði mikilvæg tímamót í sögu HD ehf., en þá voru liðin 30 ár síðan fyrirtækið setti niður sína fyrstu djúpdælu. Frá þeim tíma hefur HD byggt upp reynslu og einstaka þekkingu á hönnun, smíði, niðursetningu, gangsetningu og viðhaldi djúpdæla fyrir jarðhitakerfi – bæði á Íslandi og á alþjóðavettvangi.

Á síðustu þremur áratugum hefur HD komið að hönnun, smíði og rekstri á yfir 130 djúpdælum á Íslandi, sem flestar eru enn í stöðugum rekstri. Dælurnar gegna lykilhlutverki í íslenskum jarðhitakerfum og eru burðarásar í hitaveitum, orkuframleiðslu og afhendingaröryggi.

Samhliða verkefnum á Íslandi hefur HD einnig byggt upp sterka stöðu á alþjóðavettvangi, meðal annars í Rúmeníu, Slóvakíu, Tyrklandi, Frakklandi, Ungverjalandi og Kína. Verkefnin hafa falist í bæði stökum uppsetningum á djúpdælum sem og heildarlausnum fyrir jarðhitakerfi og hitaveitur. Í sumum tilfellum hefur niðursetning dælna náð allt að 350 metra dýpi og rekstur farið fram við hitastig allt að 170°C.

„Reynslan sem við höfum byggt upp á síðustu 30 árum er ekki tilviljun. Hún verður til í rekstri, við raunverulegar aðstæður, þar sem kröfur um öryggi, endingu og áreiðanleika eru alltaf í forgrunni,“ segir Lýður Skúlason, sviðsstjóri orkusviðs HD.

Að sögn fyrirtækisins er 30 ára reynslan ekki aðeins áfangi í sögunni, heldur grunnur að áframhaldandi þróun og nýsköpun í djúpdælukerfum og jarðhitalausnum til framtíðar.